Ավարտվեց ֆուտբոլի Չեմպիոնների լիգայի եզրափակիչ հանդիպումը` Մյունխենի "Բավարիայի" եւ Լոնդոնի "Չելսիի" միջեւ:
Գրեթե ամբողջ հանդիպման ընթացքում մյունխենցիներն ունեին խաղային եւ տարածքային բացահայտ առավելություն: Առաջին կեսում ստեղծած եւ ոչ մի վտանգավոր պահ չավարտվեց դարպասի գրավմամբ ու թիմերն ընդմիջման գնացին 0:0 հաշվի ժամանակ:
Երկրորդ կեսը եւս անցավ նույն սցենարով եւ գերմանական գրանդի ֆուտբոլիստները շարունակաբար ուժեղ ճնշման տակ էին պահում "ազնվականների" պաշտպանական դիրքերն ու դարպասապահին: Լոնդոնցիները փորձում էին դիմել սուր հակագրոհների, որոնցից մի քանիսն իսկապես վտանգավոր ստացվեցին:
Մյունխենցիների մեծ առավելությունն ու ճնշումն, ի վերջո, տվեց իր սպասված արդյունքը: Հանդիպման 83-րդ րոպեին Թոմաս Մյուլլերը կարողացավ գլխի հարվածով եզրափակել Ֆրանկ Ռիբերիի կատարած օդային փոխանցումը` առաջ մղելով "Բավարիային": Սակայն տանտերերի ուրախությունը կարճ տեւեց: Ընդամենը 5 րոպե անց Դիդյե Դրոգբան հերթական անգամ, այս մրցաշրջանում, ցույց տվեց, որ ինքը գրեթե միշտ դրության տերն է օդային պայքարում: Հաշիվը հավասարվեց եւ խաղը տեղափոխվեց լրացուցիչ ժամանակ:
Լրացուցիչ առաջին խաղակեսի մեկնարկում արդեն, Դիդյե Դրոգբան սեփական տուգանային հրապարակում խախտեց կանոնները` Ֆրանկ Ռիբերիի հետ պայքարում եւ հանդիպման գլխավոր մրցավարը ցույց տվեց 11մ. նշակետը: Բայց Արյեն Ռոբբենի անհաջող հարվածի ճանապարհին կանգնեց Պետեր Չեխը: Հաշիվը մնաց անփոփոխ, նաեւ լրացուցիչ ժամանակի առաջին խաղակեսից հետո:
Լրացուցիչ ժամանակի երկրորդ խաղակեսի մեկնարկում Բավարիան հաշվի մեջ առաջ անցնելու եւս մեկ հնարավորություն ստացավ, սակայն փոխրինման դուրս եկած Իվիցա Օլիչի հարված-փոխանցումը ոչ մի կերպ արդյունավետ չստավեց` չնայած շատ վտանգավոր էր: Սակայն այս խաղում այլեւս դարպասի գրավում չարձանագրվեց եւ Չեմպիոնների լիգայի գավաթակիրը որոշվեց հետխաղյա 11մ. հարվածաշարում:
Ֆուտբոլային վիճակախաղում ավելի հաջողակ էին "Չելսիի" ֆուտբոլիստները , ովքեր եւ նվաճեցին Եվրոպական ակումբային ամենահեղինակավոր մրցաշարի գավաթը:
