Հայաստանի հավաքականի խաղացող Էդգար Մանուչարյանն այսօր իր նորամուտը նշեց Եկատերինբուրգի «Ուրալում»: Ռուսաստանի առաջին դիվիզիոնի 22-րդ տուրի շրջանակներում «Ուրալը» սեփական հարկի տակ մրցեց մերձմոսկովյան «Խիմկիի» հետ: Մանուչարյանը պահեստայինների թվում էր եւ փոխարինման դուրս եկավ ընդմիջմանը, իսկ նրա թիմը հաղթեց 5:2 հաշվով:

Առաջին խաղակեսից հետո «Խիմկին», որի հիմնական կազմում էր Ռոման Բերեզովսկին, հաղթում էր 1:0 հաշվով, սակայն երկրորդ խաղակեսում տանտերերին հաջողվեց գերարդյունավետ խաղ ցուցադրել եւ միանգամից 5 գնդակ ուղարկել հյուրերի դարպասը: «Ուրալի» խաղը զգալիորեն աշխուժացրեց էդգար Մանուչարյանը, ով կատարեց երկու գոլային փոխանցում: «Ուրալի» կազմում դուբլի հեղինակ դարձավ Դենիս Թումասյանը, իսկ 83-րդ րոպեին փոխարինման դուրս եկավ հայազգի մեկ այլ ֆուտբոլիստ՝ Նիկոլայ Սաֆրոնիդին:

Մրցավարի ավելացրած ժամանակում կարմիր քարտի արժանացավ Էդգար Մանուչարյանը, ով խաղադաշտից հեռացվեց մրցակցին հարվածելու համար:

«Ուրալը» վստահ հաղթանակ տոնեց եւ 38 միավորով դուրս եկավ 4-րդ հորիզոնական, իսկ «Խիմկին», որտեղ մոտ օրերս կարող է հայտնվել «Փյունիկից» հեռացած Արտակ Ալեքսանյանը, 22 միավորով 18-րդն է: