|
Իտալիայի Ա Սերիայի շրջանակներում, երեկ կայացավ Բարի-Ռոմա հանդիպումը,
որն ավարտվեց մայրաքաղաքային թիմի՝ 2-3 հաշվով հաղթանակով: Երկու գոլ իր
հաշվին գրանցեց Ռոմայի լեգենդ Ֆրանչեսկո Տոտտին, որից հետո, Իտալիայի Ա
Սերիայում նրա գոլերի քանակը հասավ 206-ի:
Այդ ցուցանիշով, Ֆրանչեսկո Տոտտին, այժմ արդեն Իտալիայի Ա Սերիայի բոլոր
ժամանակների հինգերորդ լավագույն ռմբարկուն է, քանի որ առաջ անցավ
իտալական ֆուտբոլի մեկ այլ լեգենդի՝ Ռոբերտո Բաջոյին (205 գոլ):
Ռոմայի 34-ամյա ավագը, Ա Սերիյաի բոլոր ժամանակների ռմբարկուների
ցուցակում զիջում է Սիվիո Պիոլային (274 գոլ), Գունար Նորդալին (225 գոլ),
Ջուզեպպե Մեացային ու Ժոզե Ալտաֆինիին (երկուսն էլ՝ 216 գոլ):
Տոտտին, այս մրցաշրջանում արդեն աչքի է ընկել 14 անգամ և իր ցուցանիշը
կարող է բարձրացնել, քանի որ դեռ երեք տուր կա, մինչ մրցաշրջանի ավարտը:
Բավական իրատեսական է, որ արդեն մյուս մրցաշրջանում, Տոտտին դուրս գա
ռմբարկուների ցանկի երրորդ հորիզոնական, քանի որ այդ տեղում հայտնվելու
համար, նրան մնացել է խփելու 11 գոլ:
«Երջանիկ եմ, որ իմ կարիերայի ընթացքում, կարողացա ևս մեկ ռեկորդ
սահմանել և հույս ունեմ գերազանցելու նաև այլ ռեկորդներ»,- Բարիի հետ
կայացած հանդիպումից հետո ասել է Տոտտին:
|
