|
Միլանի Ինտերի պաշտպան Մարկո Մատերացին հայտարարել է, որ Զինեդին
Զիդանի հետ այլևս որևէ խնդիր չունեն և իրենց միջև արդեն զինադադար է
կայացել: Պարզվում է, որ երկու ֆուտբոլիստները հանդիպել են իրար հետ, երբ
Ռեալը, Չեմպիոնների լիգայի շրջանակներում, մեկնել էր Միլան՝ հանդիպում
անցկացնելու տեղի համանուն թիմի հետ:
«Հանդիպեցինք հյուրանոցի ավտոկայանատեղիում: Դեմ առ դեմ հանդիպումն այլ
էր, քանի որ հասանք զինադադարի: Նա ասաց, որ չճանաչեց ինձ և կարծում էր,
որ ինչ-որ երկրպագու եմ: Նրան պարզեցի ձեռքս և ասացի, որ ափսոսում եմ այն
ամենի համար, ինչ պատահել է: Նա ինձ պատասխանեց. «Ո՛չ, ո՛չ, չկա որևէ
խնդիր, մի անհանգստացիր»»,- իրենց հանդիպումը ներկայացրել է Մատերացին՝
ֆրանսիական So Foot-ին տված հարցազրույցում:
Հիշեցնենք, որ Աշխարհի 2006 թ. առաջնության եզրափակիչում, երբ իրար դեմ
խաղում էին Ֆրանսիայի և Իտալիայի հավաքականները, Մատերացին ինչ-որ բան
ասաց Զիդանին, որից հետո վերջինս գլխի հարված հասցրեց իտալացու կրծքին և
նրան տապալեց գետնին: Այդ դեպքից հետո, Զիդանը հեռացվեց խաղադաշտից, իսկ
հանդիպումը, հետխաղյա 11մ. հարավածաշարի արդյունքում (5-3), ավարտվեց
Իտալիայի հաղթանակով, որն էլ հռչակվեց աշխարհի չեմպիոն:
|
