Ֆուտբոլի Ադրբեջանի հավաքականի ավագ Ռաշադ Սադիխովը խոստովանել է, որ ազգային հավաքականի ֆուտբոլիստներին տխրեցնում է այն փաստը, որ Հայաստանի ու Վրաստանի հավաքականների ցույց տված արդյունքներն անհամեմատելի են, այն արդյունքների հետ, որոնք ցույց է տալիս Ադրբեջանի հավաքականը:
«Մեզ նույնպես տխրեցնում է այն հանգամանքը, որ հարևանները մեզանից առաջ են անցել,- Սադիխովի խոսքերը մեջբերում է Azerisport-ը: Բայց նայեք այն խմբերին, որտեղ հայտնվել են նրանք և համեմատեք մեր խմբի հետ: Ես այդքան վրացիներին նկատի չունեմ, որքան հայերին: Նրանք, կարծես թե, երեք խաղ են անցկացրել սեփական հարկի տակ, իսկ մենք ընդամենը մեկ խաղ: Ես պարզապես ցանկանում եմ երկրպագուներին կոչ անել լինել համբերատար և սպասել շրջափուլի ավարտին ու չմոռանալ, որ նույն հայերի հետ հանդիպումներում մենք միշտ հաղթանակներ ենք տարել»,- ասել է Սադիխովը:
Հիշեցնենք, որ անկախ Հայաստանի ու Ադրբեջանի ֆուտբոլային հավաքականները երբեք չեն հանդիպել: Հայկական և ադրբեջանական ֆուտբոլների ճանապարհները խաչվել են միայն ԱՊՀ և Բալթյան երկրների համագործակցության գավաթի խաղարկության ակումբային մրցաշարում:
