Գվարդիոլային արդեն հոգնեցրել է պահպանել քաղաքակրթության բարձրագույն նորմերը ու ակումբի իմիջի բարձրացմանը նպաստելը, որից տուժում է իր թիմի խաղը: Եվ ահա Պեպ Գվարդիոլան սկսել է խոսել ոչ միայն գեղեցիկ, կոմբինացիոն ֆուտբոլի մասին, այլ մեկնաբանել է մրցավարական որոշումները:

Գվարդիոլան արդեն ոչ միայն իր խաղացողներին է կոչ անում հարձակվել մրցակցի դարպասներին ու գոլեր խփել, այլ ինքն է հագել մարտական հանդերձանքը, ձեռքն է վերցրել ամենասուր թուրը` խոսքը, ու աշխատում է մի ուղղությամբ` ճնշել ու ազդել «Մադրիդի» ու մրցավարների վրա: Այն, որ այս քայլով նա փոքր ինչ կարող է օգնել իր թիմին, ստիպել է նրան վայր դնել քաղաքակրթությունը ու խոսել մրցավարների մասին, ինչը ավելի լավ ստացվում էր Ժոան Լապորտայի մոտ («Բարսայի» նախորդ նախագահը): Եվ ահա շաբաթ օրը նա առաջին անգամ խախտեց արդեն ավանդույթ դարձած սովորությունը ու խոսեց մրցավարության մասին:

Գավաթի եզրափակչից 3 օր անց նա ակնարկեց, որ գավաթը բաժին հասավ «Ռեալին» եզրային մրցավար Ֆերմին Մարտինեսի փայլուն տեսողության շնորհիվ, ով նկատեց մի քնաի սանտիմետրանոց խաղից դուրս վիճակը Պեդրո Ռոդրիգեսի մոտ: Նա կարծում է, որ այդ որոշումը ավելի շատ ուղղված էր ոչ թե դեպի արդար խաղը, այլ «Բարսելոնայի» դեմ: Բայց նա խոսեց ոչ միայն մրցավարի, այլև Մոուրինյոյի ընտրած խաղաոճի մասին.«Մենք պետք է նախ կարողանանք հարմարվել «Բեռնաբեուի» բարձր խոտին, հետո նոր սկսենք խաղալ մեր խաղը: Նրանք ունեն շատ լավ թիմ, բայց մենք ունենք նրանց հակադրելու բան: Բացի այդ մեր դեմ են լինելու ոչ այնքան բարեհամբույր երկրպագուներ: Այո, այս խաղում ֆավորիտ է այն թիմը, որին առաջնությունում գերազանցում ենք 8 միավոր»:

Գվարդիոլան նաև հեգնանքով է սկսել խոսել Մոուրինյոյի մասին: Քննարկելով այն, որ չորեքշաբթի կայանալիք կլասիկոն ամենայն հավանականությամբ կվարի Պեդրո Պրոենսան (սա դեռ հաստատված տեղեկատվություն չէ), Գվարդիոլան նշեց.«Դրանից պետք է շատ գոհ լինի Մոուրինյոն»:

Այսպիսով Գվարդիոլան սկսել է նյարդայնանալ, ինչը պարզ է նրանից, որ առաջվա պես նրա հարցազրույցները բաղկացած չեն միայն գեղեցիկ ֆուտբոլի ու իր թիմի ելույթների մասին մեկնաբանություններից: