Ալեքս Ֆերգյուսոնը մտադիր է օգտագործել Ֆրանկ Ռիբերիի առավելությունները "Մանչեսթեր Յունայթեդի” ապագա մրցավեճերում, այդ իսկ պատճառով հերթական անգամ փորձում է  ձեռք բերել "Բավարիայի” ֆրանսիացի ֆուտբոլիստին, փոխանցում է sportbox-ը` հղում կատարելով   caughtoffside.com-ին:

Առաջին անգամ "կարմիր սատանաների” մարզիչը նկատել էր Ռիբերիին 2007թ., բայց այն ժամանակ "Բավարիան” ավելի ճարպիկ էր գտնվել այդ հարցում` գնելով Ռիբերին, ով այնուհետև երկու անգամ օգնել է մյունխենցիներին հաղթել բունդեսլիգայում: Այժմ ժամանակները փոխվել են: "Բավարիայի” երազանքների գագաթնակետն այս մրցաշրջանում երրորդ հորիզոնականն է, որն էլ կապահովի հաջորդ Չեմպիոնների լիգայի ուղեգիրը: Եվ փաստ չէ, որ նրանք կնվաճեն այդ ուղեգիրը. եզրափակչից երեք տուր առաջ Լուի վան Գալին փոխարինած Յուպ Հեյնկեսի սաները զբաղեցնում են 4-րդ հորիզոնականը, որը երաշխավորում է միայն նրանց մասնակցությունը Եվրոպայի լիգային: Հազիվ թե այս առաջարկը գայթակղի հավակնոտ Ռիբերիին: 

Իսկ "Մանչեսթերում” 28-ամյա ֆրանսիացին կարող է շատ օգտակար լինել: Սըր Ալեքսը համոզված է, որ Ռիբերին կարող է ուժեղացնել "կարմիր սատանաների” կիսապաշտպանությունը, ընդ որում կարևոր չէ, թե որ դիրքում նա հանդես կգա` ենթահարձակվողի թե եզրային ֆուտբոլիստի: Բացի դրանից` լուրեր են պտտվում, որ Նանին կարող է լքել "Մանչեսթեր Յունայթեդը”: Այդ դեպքում Ռիբերիի ձեռքբերումն իսկապես շատ տեղին կլինի: