«Փյունիկի» գլխավոր մարզիչ Վարդան Մինասյանը Հայաստանի առաջնության հինգերորդ տուրի խաղում «Շիրակի» նկատմամբ տարած հաղթանակից հետո (1-0) հետևյալ կարծիքը հայտնեց:

- Շատ նյարդային խաղ ստացվեց: Պետք է առաջին կեսում իրացնեինք մեր հարյուր տոկոսանոց գոլային պահերը, որպեսզի ավելի հանգիստ խաղայինք: Նորից կրկնեմ, որ «Շիրակն» այս տարի բավական լավ տպավորություն է թողնում՝ շատ կազմակերպված թիմ է: Խաղը կարող էր նաև ոչ-ոքի ավարտվեր, որովհետև իրենք պահեր ունեին երկրորդ կեսում: Կրկին կարող եմ ասել, որ ինչ-որ տեղ մեր բախտը բերեց: Մեր խաղի որակի վրա ազդում են նաև մեր հարկադրված փոփոխությունները: Կրկին վնասվածք ստացավ մեր կենտրոնական պաշտպանը, բայց մեր ունեցած ֆուտբոլիստներով կարողացանք ինչ-որ կերպ կարգավորել խաղը:

- Ինչու՞ էր բացակայում Մարկոսը:

- Մարկոսին հանգստանալու հնարավորություն ենք տվել, քանի որ նրան դեռ խանգարում են վնասվածքները: Նա մարզումներն էլ է բաց թողնում մինչև ամբողջական ապաքինումը:

- Խաղի ընթացքում ֆուտբոլիստները մի քանի անգամ փոխեցին դիրքերը: Ինչո՞վ էր դա պայմանավորված:

- Առաջին տեղափոխությունը, երբ Յուսպաշյանը տեղափոխվեց պաշտպանություն, կապված էր վնասվածքի հետ: Երկրորդ տեղափոխությունը կապված էր նրա հետ, որ առաջին կեսի վերջին 15 րոպեում զիջել էինք դաշտի կենտրոնը և Արտակ Եդիգարյանը տեղափոխվեց դաշտի կենտրոն: Ես գտնում եմ, որ դրանից խաղի որակը չընկավ ու ավելի նորմալ խաղացինք: Լավ է, որ առանց փոխարինում կատարելու ենք անում այդ տեղափոխությունները: Համենայն դեպս, ինչ արել ենք, լավ օրից չենք արել:

- Ձեր կարծիքը Գագիկ Պողոսյանի հեռացման վերաբերյալ: Նա ծափահարեց մրցավարին դեղին քարտ ստանալուց հետո:

- Պետք է պարզենք: Համենայն դեպս, եթե հեռացվել է ուրեմն իրեն անվայել է պահել ու տեղին է հեռացվել: Եթե իսկապես այդպես է եղել, ուրեմն ակումբի կողմից կպատժվի:

- Պանտիչի հեռանալուց հետո «Փյունիկը» դարպասապահի կարիք է զգալու:

– Այո, զգալու ենք: Հունիսի մեկին, երբ կբացվի տրանսֆերային պատուհանը, կձգտենք նոր դարպասապահ ձեռք բերել: Ինձ համար ամենակարևոր տեղերն են դարպասապահի ու գոլ խփող հարձակվողի դիրքերը:

-  Պանտիչը չարդարացրե՞ց սպասելիքները:

- Ո՛չ, մենք ռիսկի էինք դիմել՝ նրա հետ պայմանագիր ստորագրելով, քանի որ շատ քիչ էր ժամանակը և տեսաերիզներով էինք տեսել իր խաղը, բայց սխալվեցինք: Այդպես էլ է պատահում: