Ընթացիկ մրցաշրջանը հաջող է սկսել "Իմպուլսի" հարձակվող Զավեն Բադոյանը' աչքի ընկնելով արդյունավետ խաղով: "Գանձասարի" հետ խաղում իր 3-րդ գոլը խփելով,  Բադոյանը 7 գնդակով դարձավ բարձրագույն խմբում "Իմպուլսի" լավագույն ռմբարկուն' շրջանցելով Էլտոն Կարդոսոյին, որը նախորդ մրցաշրջանում 6 գոլի հեղինակ էր դարձել:

Զավեն Բադոյանն "Իմպուլսի" կազմում ընդգրկվեց 2010թ.' տեղափոխվելով "Գանձասարից", որի կազմում հանդես էր գալիս Կապանում բանակում ծառայության ընթացքում: Նրա նորամուտը դիլիջանյան թիմում տեղի է ունեցել 2010թ. առաջնության մեկնարկային տուրում' մարտի 27-ին "Ուլիսի" հետ կայացած խաղում: Երիտասարդ ֆուտբոլիստն առաջին իսկ հանդիպումներից ամրապնդվեց թիմի մեկնարկային կազմում' դառնալով հարձակման գծի առաջատարներից մեկը: "Իմպուլսում" գոլերի հաշիվը նա բացեց արդեն հաջորդ տուրում' ապրիլի 3-ին գրավելով "Բանանցի" դարպասապահ Ցվետոմիր Ցանկովի պաշտպանած դարպասը: Դա նաև բարձրագույն խմբում "Իմպուլսի" խփած անդրանիկ գնդակն էր: Նախորդ առաջնությունում Բադոյանն անցկացրած 27 հանդիպումներում 4 գոլի հեղինակ է դարձել: Մնացած 3 գոլերը նա խփել է 24-26-րդ տուրերում' մեկական անգամ գրավելով "Փյունիկի", "Կիլիկիայի" և "Շիրակի" դարպասները:

Զավեն Բադոյանը ֆուտբոլային կարիերան սկսել է "Կիլիկիայում" 2006թ.: Դեռ 17 տարին չլրացած ֆուտբոլիստը թիմի կազմում մասնակցեց 13 հանդիպման ու մեկ գոլ խփեց' հոկտեմբերի 21-ին գրավելով "Փյունիկի" դարպասը: Հաջորդ մրցաշրջանում նա արդեն թիմի հիմնական կազմի ֆուտբոլիստ էր' 26 հանդիպումներում խփելով 1 գոլ: 2008թ. զորակոչվելով բանակ, Բադոյանը մինչև ծառայության ավարտը հանդես եկավ "Գանձասարում", որի կազմում անցկացրած 21 հանդիպումներում 1 գոլ խփեց:

Ներկայումս 21-ամյա ֆուտբոլիստն "Իմպուլսի" առաջատարներից մեկն է: Նա 3 գնդակով ընթացիկ առաջնության լավագույն ռմբարկուների ցանկում է:

"Իմպուլսը" 2-րդ մրցաշրջանն է անցկացնում բարձրագույն խմբում: Անցած մրցաշրջանում թիմը 28 հանդիպումներում 31 գոլ խփեց: Բոլորից արդյունավետ գործեց բրազիլացի Էլտոն Կարդոսոն, թեև նա թիմի կազմում ելույթները սկսեց 13-րդ տուրից: Կարդոսոյի նորամուտը հաջող անցավ: Հունիսի 26-ին Դիլիջանում "Միկայի" հետ կայացած խաղում Կարդոսոն 41-րդ րոպեին գրավեց Արթուր Հարությունյանի պաշտպանած դարպասը' արձանագրելով հանդիպման վերջնական հաշիվը' 2:2: Օգոստոսի 1-ին կրկին Դիլիջանում,  "Ուլիսի" հետ խաղում Էլտոնի խփած 2 գոլերը հաղթանակ պարգևեցին "Իմպուլսին"' 2:1: Հետագա հանդիպումներում բրազիլացի ֆուտբոլիստը մեկական գնդակ խփեց "Փյունիկի", "Շիրակի" և "Կիլիկիայի" դարպասները:

Ահա թե ովքեր են դարձել բարձրագոյն խմբում "Իմպուլսի" խփած 39 գոլերի հեղինակները: